أبدأ كلامى بالصلاة على النبـــــــــى وألعن أبو اللى مخبى مال المسلميــن
واللى خد مال البنوك سرقه وسافــــر واللى غرق مركبه ألف
ومتيـــــــــنواللى زور واللى نافق واللى دلــــس واللى خد بالقوة حق الغلبانيـــــــــــن
واللى حط لجام على لسان البشـــــــر واللى حط ف كرشه مال الشقيانيــن
واللى سرق اللقمه من بق الغلابــــــة واللى قاعد على الكراسى من سنيــن
والعن اللى ف المجالس لسه قاعـــــد شغلته يسقف ويرفع الإيديــــــــــــــن
وألعن الأقزام فى كل كتاب وملــــــة والطوال ملعون أبوهم مرتيـــــــــــن
والأبالسة اللى بقانون الطـــــــوارئ لجموا لسان الخلايق والعنيــــــــــــن
لفقوا الدستور عشان حبة مصالــــــح بعد ما كانت الرياسه مدتيــــــــــــــن
واشتروا الدنيا وسابوا الآخرة تخرب والضمير ضربوه فى وشه بلغتيـــــن
والعن اللى ساب بلد تخرب وتغـــرق باعها للسمسار بفكه وجنيهيـــــــــــن
واللى غلى الكيماوى والتقــــــــــاوى واللى نشف دم كل الفلاحيــــــــــــــن
واللى خلى الناس على القهوه تزاحــم واللى ساق الناس لسوق العطلانيــــن
وألعن الطرطور والعن كل عمــــــــه فوق دماغ أراجوز بيفتى ف كل ديــن
واللى افتى بقطع ايد سارق رغيـــــف من زبالة قصر فيه اكبر بسيـــــــــــن
وألعن الخوازيق اذا كانت مقاســـــــى أو مقاس مظلوم ف سجن المظلوميـن
وألعن الأراجوز إذا كان ف الوزارة فى كل كلمة وكل رأى يقول آميـــــن
وألعن الشرطى اللى ساجن الدكاتـــرة والبلد مليانة سفة ومجرميـــــــــــــن
وأنهى كلامى بالصلاة على النبـــــــى وألعن أبو اللى دفعنى للقول الحزيـــن
No comments:
Post a Comment